ဖွဲ့စည်းပုံအခြေခံဥပဒေကို ပြင်ဆင်ရန် လိုသည့်အကြောင်း မရဲတရဲ ပြောဆိုဆွေးနွေးလာကြတာ မြင်ရသည်။ ကောင်းပါပေ့ .. ကောင်းပါပေ့။ Something is better than nothing ဟုပင် ဆိုကြတာကိုး။
ကျနော်ကတော့ အရေးတကြီး ပြင်ဆင်စရာအချက် တစ်ချက်ကို သတိထားမိသည်။ နိုင်ငံတော်သမ္မတ၏ အရည်အချင်းသတ်မှတ်ချက်တွင် စစ်ရေးအမြင်ရှိသူဖြစ်ရမည် ဟူသော အချက်ပင် ဖြစ်သည်။ လက်ရှိသမ္မတကြီးကို ကြည့်ပါ။
ကချင်တွေကို ထိုးစစ်မဆင်ရန် အမိန့်ပေးသည့်အခါ (အဲ ဟုတ်ပါဘူး) ညွှန်ကြားသည့်အခါ တပ်မတော်က နယ်မြေစိုးမိုးရေး ပြောင်းလုပ်သည်။ ထိုးစစ်ဆင်ခြင်းမရှိဟု သမ္မတက သတင်းထုတ်ပြန်သည့်အချိန် ကေအိုင်အေ ခြေကုတ်စခန်း(၃)ခုလောက်ကို သိမ်းထားပြီး ဖြစ်သည်။ ထိုးစစ်ဆင်သော်လဲ လေယာဉ်မသုံးပါဟု သမ္မတပြောသည့်အခါ တပ်မတော်၏ လေကြောင်းထိုးစစ် ရုပ်သံသတင်းကို နိုင်ငံခြားသတင်းဌာနများက ထုတ်လွှင့်ပြသနေသည်။ အသုံးပြုပါသော်လည်း အုပ်ချုပ်ရေးလုပ်ငန်းအတွက်သာ သုံးရခြင်းဖြစ်သည်ဟု သမ္မတက ပြောစဉ်၊ တပ်မတော်၏ တိုက်ခိုက်ရေးရဟတ်ယာဉ်တစ်စီးကို ကေအိုင်အေက ပစ်ချလိုက်သည်။ မလွှဲမရှောင်သာသဖြင့် (တစ်နည်းဆိုရသော် အခြေအနေ မဟန်သဖြင့်) လေကြောင်းပစ်ကူယူရကြောင်း သတင်းရှင်းလင်းနေစဉ်တွင် ဒေါ်လာသန်းချီကုန်နှင့်ပြီ ဖြစ်သည်။ ကန့်သတ်ထိုးစစ်ကို ရပ်တန့်ကြောင်းကြေညာပြီး နှစ်ရက်၊ သုံးရက်အကြာတွင်မှ ခယာဘွမ်ပို့စ်ကို တပ်ရင်းလိုက်ရင်းပြီး တက်သိမ်းသည်။
တော်ရုံတန်ရုံ စစ်ရေးအမြင်ရှိရုံမက တပ်မတော်တွင် ဗိုလ်ချုပ်ကြီးအဖြစ် တာဝန်ထမ်းဆောင်ခဲ့ဖူးသူ လက်ရှိသမ္မတကြီး၏ အမိန့်ညွှန်ကြားချက်များသည်ပင် တပ်မတော်၏ အမိန့်နာခံမှုဆိုတာကြီးကို မမီမကမ်းဖြစ်နေသည်ဖြစ်ရာ စစ်ရေးအမြင် မရှိသူတစ်ဦးသာ သမ္မတဖြစ်လာပါက၊ သမ္မတနှင့် တပ်မတော်အကြား ရင်ကြားကော၊ ဖင်ကြားပါစေ့နိုင်မည် မထင်ပါ။
ထို့ကြောင့် ဖွဲ့စည်းပုံကို ပြင်ဆင်မည်ဆိုပါက သမ္မတ၏ အရည်အချင်းသတ်မှတ်ချက်တွင် “သမ္မတသည် စစ်ရေးအမြင်ရှိရမည်” ဟူသောအချက်အစား “သမ္မတသည် တပ်မတော် ကာကွယ်ရေးဦးစီးချုပ် ဖြစ်ရမည်” သို့မဟုတ် “တပ်မတော် ကာကွယ်ရေးဦးစီးချုပ်သည် နိုင်ငံတော် သမ္မတဖြစ်ရမည်” ဟု ပြင်ဆင်သင့်ကြောင်း နှက်ကြောင်းပေးလိုက်ရပါသည်။
သဗ္ဗေသတ္တာ ကမ္မတကာ။
မောင်ရေခဲ
0 comments:
Post a Comment