Hpyen asuya gaw KIA hpe gap jahkring dat ya na matu n’gup de na tsun nga tim lata hte gaw gap bun nga ding yang, lagaw de gaw KIA ni nga ai shara shagu de gasat shamyit sa wa nga ding yang galaw nga ai. Dai zawn galaw taw nga ai gaw teng sha kasat jahkring na hpe myit nlawm nga ai hpe sak se rai nga ai.
Myen hpyen wa gasat jahkring ga ngu ai gaw;
-Anhte asuya hpyen dap kaw na gasat jahkring ga ngu tsun ai tim KIA ni she ningdang taw nga ma ai majaw anhte mung nlai lu na gasat nga ai re ngu maigan mungdan ni kam na matu galaw madun ai lam sha rai nna KIA hpe mung masha ni n’ju wa hkra, ninghkap wa hkra galaw nga ai lam sha re.
-2014 ning hta ang ai ASEAN ningbaw shara hpe lu la na matu gasat jahkring na hpe tsun masu ai lam ni sha re. Mungdan kata majan bin nga yang shara lu la na ma nre.
- Mali Hka, N’mai Hka hte Damau Hka(Ta-ping) ni hta galaw taw nga ai hka wan hpaga ni nsum mat na matu hte, Shwe Gas wan sau hpe lahta sam mung hku len shalai la na hta ding bai ding na nnga hkra a matu tsun ai lam ni sha rai nga ai.
Hpyen asuya wa teng sha gasat majan jahkring kau mayu ai teng yang hpa majaw shanhte asuya hpyen dap ginjaw kaw nna gasat jahkring matsun hpe ndau shabra ai lam n’galaw lu ai law? Hpa majaw Jinghpaw ni nga ai shara shagu de hpyen n’gun jat shalaw ding yang, sinat-laknak shagreng nga ding yang, myawk sinat kaba ni hte gap bun nga ding yang galaw nga ai law, hpa majaw mara kata mare masha ni hpe zing ri ai law, Hpa majaw mung masha majan yen tsin yam ni hpe garum na lam pat kau ya ai ta?
Shanhte maga gaw majan shagreng dingyang, KIA hpe gaw gap jahkring mu ngu tsun ai gaw jaw ai lam rai kun? Lai wa sai gasat jahkring tawn ai aten hta hpa majaw Shanglawt magam gun ni hpe mara kata rim sat sharu ai? Dai hku galaw taw nga ai lam ni gaw Jinghpaw myu sha ni hpe hpyen hku masat nna amyu shamyit majan galaw nga ai lam re. Myen asuya gaw jet ai mung hpawm mungdan, sim sa ai hte bawng ring ai mungdan galaw mayu ai rai yang,
a) 1947 ning na Pang Lung myit hkrum ga shaka hpe hpa majaw masat masa hkrang shapraw n’ galaw ai?.
b) Mungdan mung bawng rapdaw galaw nga ai ten hta KIO kaw nna tang shawng dat ai Jinghpaw Wunpawng myu sha ni hte mungdaw a rudi ahkaw ahkang ni hpe hpa majaw masat hkap la shagrin ya ai lam n’galaw ai?.
c) Mungdan uphkang tara u-padi hta Jinghpaw ni hte seng ai ru di ahkaw ahkang ni hpe hpa majaw n’shalawm ai?.
d) Hpa majaw Jinghpaw mung masa pati galaw na pat kau ya ai?
e) Bin taw nga ai mung masa mang hkang ni hpe man hkrum bawng ban hparan na matu nkam galaw ai?.
Ndai zawn re n’tara ai hku galaw taw nga ai, n’shawp nkap re myen hpyen asuya hpe ning hkap gasat ai lam gaw shut ai yi? Myen hpyen asuya gaw hpyen yen mung shawa law wa jang, KIA ni jam jau wa na, mare masha ni ninghkap wa na re ngu shadu na nhten! Rai tim hpyen yen masha law wa magang myen hpyen hpung ni hpe nju ai law magan, rawt malan n’gun ja wa magang she rai wa na re. Hpyen yen tsin yam gaw myen asuya n garum tim hparan la lu wa ai na rai nga ai. Dai mjaw,
-Ndai gasat majan kaw nna akyu pru ai mung masa lam yen ni bawng ban daw dan la lu hkra matut shakut ra saga ai.
- KIA hte kaga laknak lang kasat amyu baw sang hpung ni mung hpawm myen mung hta tara shang ai mung hpawm hpyen dap bin mat wa hkra galaw sa wa ra sai. Moi mung Jinghpaw Hpyen Dap ngu ai ni tara shang nga lai wa re.
- Mung hpawm mung dan a up hkang tara u-padi hta amyu baw sang ni a sak hkrung lam a matu hkam daga re u-padi nnga ai, myu sha ni hpe tara hte nhtan shai ai hku zingri taw nga ai hpyen hpe kadai mung makawp maga ya ai n nga ai majaw laknak lang ra nga ai lam hpe mungkan ting atsawm chye na hkra galaw ra ai.
- Amyu baw sang majan yen mung masha ni hpe myen hpyen asuya gaw garum jaw ai lam nnga ai hta n’ga garum jaw na ni hpe pat shing dang tawn da ai lam ni hpe mungkan ting chye hkra galaw ra ai.
Z. Hkum
De- Mungdan Ngang Kang Komiti
Malaysia – Singapore
27 July 2011
Malaysia hte Singapore mungdan kaw du nga ai Myutsaw Mungtsaw hpu nau myit su ni kaw na tinang a mungdan hpe makawp maga la lu na matu myit da ting nhtawm KIO Ginjaw de US dollar 13,000.- garum dat ai lam na lu ai hpe na chying shakawn dat ai. Matut nna shing re ai myutsaw shawang myit hpe masing myu hkum sumhpa hku shang lawm sa wa lu na ma ai hpe tup hkrak kam dat ai law.
Myen hpyen asuya gaw anhte bum nga masha ni a ntsa e tawn da ai masing ni jawm chye shajang nga sai hpe hkinjang pru wa ai hta hkan nna bai jahta yu ga. Gen. Ne Win gaw U Nu asuya hpe daru magam zing la nna laning mi uphkang wa ai shaloi mungdan hpe matut uphkang na matu yak ai lam amyu myu mu wa nu ai. Dai majaw 1963 ning hta shi a makau grup yin na du kaba ni hpe shaga la nna zuphpawng woi galaw ai lam na lu ai. Ne Win tsun ai hta:- “Anhte gaw mungdan ningbaw ningla ni rai ga ai. Raitim mungdan nchye uphkang ga ai. Grau nna laika hpaji chye ai ni hte lu su ai ni hpe gara hku nna mung n chye uphkang ga ai. Anhte uphkang lu na ni gaw hpaji n chye ai ni hte matsan masha ni sha re. Dai majaw ndai mungdan hpe lu uphkang na matu lawu na masing hte maren galaw ra na.
1. Hpaji chye ai ni hte lu su ai ni hpe ladat amyu myu hte mungdan kaw na gawt shapraw kau nna mungmasha ni yawng matsan mat hkra galaw ra na. Naw ngam nga ai hpaji chye ai ni hte lu su ai ni gaw hpyen asuya hpe madi shadaw ai ni rai ra na.
2. Ethnic nationalities myu 7 gaw myu langai hte langai a amyu htunghking, laili laika hte kaga ra sharawng ai lam ni nbung ai majaw uphkang na matu yak ai. Dai majaw shanhte amyu ni yawng n sam langai sha byin hkra shabyawng kau ra na. Dai n sam gaw gara amyu a n sam hte mung n bung na sai rai nna, Myen n sam hte shabung la mai na sai, nga ai.
3. Masha amyu ni hpe shabyawng nga ai ten hta, dai amyu ni gaw shanhte a buga ginra kaw na hprawng yen mat wa na matu zai ladat amyu myu lang ra na. Shing re ai ladat hta hkan nna gin ra langai a hpang langai hkan gasat mat wa ai hta, mungmasha ni yawng hkrit kahpra nna shanhte a gin ra kaw na hprawng yen mat ma na matu gumgai dingla, mahkawn shabrang yawng hpe zing ri roi rip sat nat ai lam galaw wa ma ai majaw mungmasha u nawng u wa gaw tinang a gin ra hpe hprawng shakram kau da wa masai.
4. Mungmasha gaw “HKA” (water) hte bung nna, rawt malan hpung ni gaw “NGA” (fish) hte bung ai. Dai majaw HKA hkyet mat ai rai yang NGA n mai nga sai, nga ai.
Dai ni na mabyin masa hpe yu dat yang, tinang a gin ra kaw HKA naw nga ai hta n-ga, maigan de du nga ai myutsaw sha ni gaw hpaji hpa rat machye machyang shawng de na hta grau dam lada kaba wa nga sai majaw grau sung ai HKA nawng kaba she byin wa nga sai. Kaga ten hta anhte amyu ni gaw masa amyu myu a majaw dumbru dumbra byin wa sai raitim, ya na zawn myusha lam yan paw pru wa ai ten hta, shada a lapran e, yawng gaw ngang kang ai kahkyin gumdin masat masa hku nna n-gun madun ai hku nna Ginjaw de garum dat lu ai rai sai. Rawt malan u hpung ni hta KIO, KDA, NDAK, Du Kaba Lasang Awng Wa, Salang Kaba Adang nga nna u hpung a amying shingteng n bung timung, yawng gaw Wunpawng myusha ni hkrai re majaw yaw shada ai pandung mung langai sha re. Nang shoi nang sha hku n myit ai sha yaw shada ai pandung langai a n pu e shamu shamawt sa wa nga ga ai.
Mungkan kaw bra mat wa sai Israel amyu ni gaw n law n la sha raitim, myit hkrum mang rum wa lu ai shani hta shanhte a mungdan lu gaw-gap la lu masai. Mungdan Ngang Kang Komiti kaw na madun dat ai kasi gaw, anhte Wunpawng Myusha ni a kahkyin gumdin lam hpe madi shadaw lu nna Israel amyu ni zawn awng padang shu la lu ai amyu she rai wa u ga, shakut sa wa ga law.
Pyilan
MATSING:- Mungdan Ngang Kang Komiti a tsaw ra shawang amyit gaw Wunpawng myu sha ni yawng a matu kasi rai u ga matu,ndai laika hpe Wunpawng Mungkan de shabra dat na hpe lajin dat ai.
Mana de myen hpyen hpung ni mawdaw kaba (30) tup hte Muse Mare na Golf pa kaw du taw sai lam buga masha ni shiga shana wa ai.
မေန႔က ဗမာ အစုိးရစစ္သားမ်ား စစ္ကားအၾကီး (၃၀) အျပည့္ျဖင့္ မူဆယ္ ျမဳိ႕ ေဂါက္ကြင္းတြင္ေရာက္ရွိေနျပီျဖစ္ ေၾကာင္း မ်က္ျမင္ ေဒသခံျပည္သူမ်ား သတင္းေပးပုိ႔လာပါသည္။
30 of Burmese army trucks full loaded with soldiers were stationed at Muse golf field in Shan state. Local eyewitness reports.
