KUP ZUP AI MYIT PYAW LAM

Lang mi hta Shabrang ma langai mi gaw kup zup ai myit pyaw lam hpe tam la na matu mying gum hkawng ai hpaji ning hkring langai mi kaw du sa wa ai,

Dai hpaji ning hkring wa gaw tsawm htap nga pyaw la ai bum n tsa kaw na n ta kaba langai mi hta shanu nga ai. Shabarang wa du yang dai hpaji ninghkring wa gaw shi a n ta kaw jinghku jingyu ni hte daw sha poi kaba galaw taw ai hpe mu ai, n ta kata hta masha ni law la ai hpe mung shi sa mu ai, madum sumpi hpung ni mung du sa ai shawa masha hpe pyaw ngawn la ai yu ngwi n sen ni hte dum shapyaw nga ma ai. Lu sha saboi n tsa hkan mung nam chyim rawng la ai malu masha ni hpe chyu sha hkyen lajang da ai, dai daw sha poi sha shawa masha ni gaw malu masha ni hpe sha let shada tsun shaga mung jahta let pyaw nga ma ai hpe shi sa mu ai. Hpaji ninghkring wa mung du sa ai shawa masha ni hpe langai hpang langai hkan shakram, shaga taw nga ai majaw Shabrang wa gaw Shi hte hkrum na matu yak la nga ai. Tsawm ra na ai hpang Shabrang wa gaw hpaji ninghkring wa hpe lu hkrum ai hte shi n dai de du sa wa ai lam a yaw shada lam ni hpe tsun dan wu ai.

Hpaji ninghkring wa mung Shabrang ma wa tsun ai ga ni hpe a tsawm madat la nna,

“Ya gaw nang hpe n dai lam ni tsun sanglang dan na a ten rai n lu ai, dai majaw nang n ta kata hkan, sunwang hkan naw yu hkawm u, hkying hkum lahkawng ram rai jang ngai kaw bai wa rit,” nga tsun dat ai. Shabrang wa hpe mung chyaw (zun) langai mi hta sau hpe bang dat ya let,

“Nang yu mada hkawm ai shaloi n dai chyaw hta na sau loi mi pi n jahkaw hkra sadi let hkawm u,” ngu htet dat ai.

Shabrang wa mung Hpaji ninghkring wa htet dat ai hte maren sau rawng ai chyaw hpe hpai let n ta kata na gawk shagu, jut shagu hkan, bai sun wang kata hkan yu hkawm nga nu ai, shi hpai da ai chyaw kata na sau hpe mung n jahkaw hkra sadi maja let yu hkawm ai. Hking hkum lahkawng ram na ai hpang Hpaji ninghkring wa hpang de bai du wa ai.

Shaloi Hpaji ninghkring wa gaw,

“Nang n ta ting yu hkawm ai hpa ni mu wa ai law? Shat sha gawk kaw noi tawn ai sumla ni hpe mu wa ai i? Laika hti gawk na Chyum laika ni hpe gaw mu wa ai kun? Sun wang kata na n sam hkum ai numri pan hpe gaw mu wa ai kun?” ngu hkap san yang,

Shabrang wagaw gaya ai myi man hte, “chyaw kata na sau hkaw mat na tsang ai majaw dai hpe sha ku taw di hpa mung n mu wa ai,” ngu hkap tsun ai.

Hpaji ninghkring wa gaw mani sum sai hte kalang bai gayin yu hkawm su ngu htet dat ai.

Shabrang wa mung hpaji ninghkring wa jaw dat ai sau bang da ai chyaw hpe bai lang let kalang bai pru mat wa ai.

N dai kalang bai yu hkawm ai shaloi Shabrang wa gaw, n ta kata na tsawm htap hkra mawn sumli da ai lam ni, sunwang kata na tsawm htap manam pyaw la ai nampan ni, sunwang kata lwi nga ai san tsawm hka shi hte hka kata pyaw chyai nga ai nga kasha ni hpe n gun mi a lu rai yu la n na grai myit dik ai hte Hpaji ninghkring wa kaw bai wa nu ai. Shi mu wa ai lam ni yawng hpe mung sharawng shara rai Hpaji ninghkring wa hpe wa tsun dan ai.

Shaloi Hpaji ninghkring wa gaw, “ Nang yu hkawm ai gaw rai sa, Na a chyaw kata na sau ni gaw,” ngu hkap san dat ai shaloi she, shi chyaw hta sau gahte mi mung n rawng mat ai hpe Shabrang wa dum chye dat ai.

Hpaji ninghkring wa bai gahtap tsun ai gaw,

“Ngai, Nang hpe jaw ai jet ai myit pyaw hpa lam a namchyim gaw n dai rai sai, mung kan n tsa gade mi mau hpa, pyaw hpa lam ni hpe hkrum ai rai tim, chyaw kata na sau hpe gaw n mai malap ai.

Masha law malawng gaw pyaw hpa lam kaw sha myit len mat nna tinang a prat hkrun lam rawt galu kaba na lam hpe malap kau ma ai, pyaw hpa lam hta sha a ten shama kau, jahtum kau nna hpang jahtum tinang kaw hpa mung n ngam mat ai prat de du mat ma ai.

Bai tinang a nga mu nga mai lam, rawt jat galu kaba lam hpe sha myit hta bang da n na makau grup yin hpe malap kau chye ma ai, tinang a myit sim sa lam, myit pyaw na lam ni hpe mung malap kau chye ma ai. Tinang a prat nga mu nga mai rawt jat galu kaba wa na lam hpe shakut shaja sa wa ai zawn, tinang a myit pyaw simsa lam a matu mung aten jaw lu hkra shakut sa wa ra nga ai.”

Mut Tsawm

MATUT HTI NA »

WA A SALUM HTE NU A SINDAI

NU a sai hte galai la, Ngai hpe shangai shaprat da.

Myitru tsampu n'hkrum hkra, Tsaw myit kaba hte bau maka.

Sharu shatsang ngai hkrap tim, Sumsai n'sam NU n'zim.

"Ngai sha tin e wa rit" nga, Ra ai tsaw myit shi jaw ya.

Machyi makaw ngai hkrum yang, Tsi mawan hkum hkra NU lajang.

Ten dep shamai shatsai ya, Nye a matu Nu Doctor.

Makam masham ngang kang hkra, Karai mungga sharin ya nga.

Jaw ai lam de NU woi wa, Nye a matu NU hpung Sara.

Laika hpaji chye hkra nga, I - L - T mung sharin ya.

Ningmu kaba ai Nye a NU, Jawng Sara hte shabung lu.

Ngai kasha asak ram wa tim, Nu a nsen ngai hpe "Tin".

Nye a matu shata gintawng, Tsaw myit kaba ai NU arawng.

Pu ai ba ai NU n'nga, Shawng lam gam maka NU gaw ya nga.

Mungkan tsin yam hpe adawt, Nye a prat hpe woi sharawt.

Tsin yam yawng hpe shi sharawng, Ru yak lam hpe kraw shing dang.

Sharung sharawt hkrum tim NU shi hkrai, Nye a man hta n'tsun ai.

Pu ai ba ai ngai hkrum ten, NU myiman hpe yu yang zeng.

NU a tsawm ai shingni dai, Mungkan ting hta grau dik sai.

Ngai hpe tsaw ai NU a sindai, Shakawn tim mung n'ma ai.

Tsawm htap E-Din sun zawn sha, Nye prat hta NU grin nga.

Yu li hku prat na WA woi wa, Layang ga de shi woi nga.

Mungkan madang dep hkra nga, Hpaji hparat shalat ya.

Jan ja marang hpe nkoi, Kanbau bungli WA manoi.

Dinghku kata nga pyaw lu, WA a atsam hpe ngai mu.

N'sin a lam de ndu hkra, WA a mung ga hte lam woi nga.

Tengman lam hta woi lashum, Kaja ai lam hta WA zinlum.

Sut masa lam hta woi shalat, Shinggyim hpaji mung woi shaprat.

Prat maka kaja wa gaw ya, Hkumzup la ai nye prat wa.

Kaba la ai WA tsaw myit, Galoi n'hten galoi n'yet.

Ning gawn La wa hta grau ai, Shi a salum tsaw myit dai.

NU yan WA a chyeju wa, Sawn yu magang dam lada.

Chyu chyang hte mung ka n'hpra, N'gup ga hte tsun n'ma,

Lunghkrung kaba zawn ngang ai, Kri dung shan a tsaw myit dai.

WA a salum hte NU a sindai tsaw myit hpe, Ndai shagawp ga hkungri hte shakawn shagrau let,

Nye a shagawp ga hpe, ndai daram mi hte hpung dim pat, matu tsat dat lu n'ngai law.

Paulu N'Jai Gum Awn

26th July, Kanu Kawa Poi hpe shagrau dat ai,

MATUT HTI NA »

NU YAN WA A TSAWRA MYIT

Moi Ah Wa sak ram, ning rum hpe tam

Kanam kaja, mu da sai nga

Mayu da ma, lapran ni hta

A ja kasa , ning shawng shawn ya

Htung hkring maka, shatup let sa

Mayu maga, myit hkrum hkap la

Shayi chying hkawn, banli langawn

Wa na sa na, myit rum sai nga

Kabu gara, shayi ap ya

Hpuja ni dat, n htoi masat

Jinghku latsa, du zup du sa

Shawa man hta, hkungran sai da

Karai man hta, shaka sai da

Gade n na, Chying hkai Nu hta

Ga awn madawn, nga mung n ngawn

N chye n kaw, nga nan n pyaw

A tsi jep yu, mahtai n pru

Kraw wang kata, hkri tung ma nga

Chying hkai Wa a, kraw salum hta

N chye tsun hkra, kabu pyaw nga

Nu a n tsa, grau chye na ya

Shawoi na hta, grai bai tsawra

Hkri tung na ma, hkam ja nga hkra

Sadi nga sa, ja htuk sha ya

Shata mung gu, n htoi mung du

Shangai machyi, hkum she gari

Gadau gadap, machyi ga hprap

Salat she grit, myi tum she tsit

Makan dat yu, ma gaw n pru

A tsam htum hkra, makan shaya

N sa htawm htawm, n gun she yawm

Chying hkai Kawa, masin ga hpra

Myit hta tsang pu, Karai hta chyu

Kyu hpyi shaja, kam hpa sai da

Chying hkai Kanu, n gun bai lu

A si a sat, n gun bai dat

A ma chya ngai, shangai dat sai

Shangai ngut tim, sai htaw n zim

Ma ngut machyi, hkum mung gari

Ma ngai hpe mu, n gun bai lu

Chying hkai Kawa, a myit mung la

Ngwi pyaw kabu, sindai gadu

Ji woi ni du, jahtawng mung htu

Shing teng mying jaw, sha ngai dai daw

Wenyi Kawa, Gumhpan sagya

Kyu hpyi hting let, mung ga mung htet

Lata mara, shaman sai da

Shangai ai hpang, a tawng marang

Hkam ja nga hkra, sha up rawng ra

A ma sharu, chyu bai shachyu

Hkum gaw n kam, jit hkri manam

Yup tung yup hka, ma bai rawt ba

Ma bai shayu, yup mung n lu

A kan bai htaw, sin nyen bai raw

Kashin sha tsai, ga yawp ngut sai

Ya sha ya sha, jit hkyi bai bya

A myit galu, n pawt daru

Shing ma e ba, la hpyen e da

Pawn ba maka, kawn lajang wa

Jam jau hkam ai, law la na sai

Ngai ma hkalung, loi li bai kung

Machyi ai ten, ngai myit garen

Nu yen Wa sha, makau e nga

Sarawun zawn, Nu yen Wa gawn

Hkrap tim n pawt, lu sha mung bawt

Ru yak tisn yam, ngai kaw du jang

Latsa lamun, nye a n gun

Nu yen Wa sha, n gun rai nga

Buju bulai, gashin shatsai

Ngai gaw sha mut, shan gaw hta hkrut

Sha san sha seng, Nu yen Wa reng

Shat gawk mung rawng, shadu kachyawng

Sha ngai shaprat, sharing shalat

Hpaji laika, ning pawt Sara

Mung ga n pawt, mau mwi kawn hkawt

Nu yen Wa sha, tsun hkai dan wa

Sak prat ram wa, jawng de sa sa

Chye chyang kung hpan, manu mung dan

Myitsu ai ma, tai wa lu hkra

Ra lam ma hkra, Nu yen Wa sha

Lit hpe n hprai, shakut masai

Nu yen Wa a, myit kraw ni hta

Karai hpe hkrit, myit hpe shagrit

Makam kri tawng, shan hta nan rawng

Kyu hpyi hting lai, Nu yen Wa rai

Kam sham a kyu, shaman chyeju

Ding hku masha, hkam la lu nga

Nu yen Wa a, shing nyip hta

Ngwi ai hka kau, nga ai hta grau

Simsa shara, Nu yen Wa sha

Ding hku kata, ra n rawng hkra

Shani shana, shakut shaja

Pu ai ba ai, tsun n nga ai

Jet ai tsaw myit, shagawng shagrit

Tsun n dang hkra, tsaw myit kaba

Mung kan n tsa, hpa hte shadaw na

Yawng hta grau ai, tsawra myit dai

Gintawng shagan, htoi shata jan

Kam hpa lahpum, a tsam rawng htum

Ding hku masha, hkru kat lu hkra

Shawng lam shing ran, masing hpe gran

Rawt jat na lam, mahkrun hpe tam

Ding hku sharing, sut gan mung chying

Yi ngam maden, lu sha n garen

Prat a n sam, manang la hkam

Masha lapran, u hpawng a man

Myi man n kaji, makawp sari

Kup zup lu hkra, Nu yen Wa sha

Lam shawng kaja, ning baw tai ya

Mung kan hpaji, hparat htau ji

Chye ging chye mai, hkam la lu ai

Nu yen Wa sha, shapan maka

Kanu Kawa, lit ngu ai nga

Lit hpe dum ai, Nu yen Wa dai

Nye sak mung ram, kanam bai tam

Kanam mung mu, kasa shadu

Hkung ga la ra, ging rawng hpaga

Ja baw yawng dat, kanam masat

Nye a matu, ngwi pyaw ding hku

Dinghku byin hkra, Nu yen Wa sha

Ding hku de ya, matut nga pra

Ngai ma sak hkrung, ding hku hkalung

Ra lam ma hkra, Nu yen Wa sha

Dep di naw yu, matut lahku

Kashu bai mu, dai ten pi du

Nu yen Wa sha, lam woi ya nga

Ding hta masa, shing ra maka

Shaning galai, masa shai sai

A sak kaba, gawng kung mat wa

Lahput lagaw, pung hpraw pung law

Shingra machyi, a hkum gari

A ga num htet, n sa mung hkyet

Shawng hpang wun doi, Karai lam woi

Chyeju htang na, ngai myit ai wa

Myit nan n ma, tsawra n ja

Masin n si, ganing n di

Ding hta na woi, Sum Sing wun doi

Dai ni du hkra, ngai myit mada

Kam hpa shara, Kanu Kawa

Ngai ra marit, grai nan katsit

Shabai n mai, hkam sha dik ai

Sum Sing na Nu, sak jan mau lu

Sum Sing na Wa, jan mau kaba

Lu la u ga, kyu hpyi shaja

Nu yen Wa a, tsawra myit hta

Grau ai n nga, ganang wa ta?

Kaba la ai, tsawra myit dai

Pang lai hta dam, gang hkau pi chyam

Shadawn n dang, yawng hta grau ang

Tsun tim n ma, hkai dan n hpra

Nu Wa chyeju, kaba sai ngu

Nu yen Wa dai, sha a ging ai

Ning law hkri awn, shagrau shakawn

Baw gum n ngai, hkung ga jaw ai.

Maran Tang GunMoi Ah Wa sak ram, ning rum hpe tam

Kanam kaja, mu da sai nga

Mayu da ma, lapran ni hta

A ja kasa , ning shawng shawn ya

Htung hkring maka, shatup let sa

Mayu maga, myit hkrum hkap la

Shayi chying hkawn, banli langawn

Wa na sa na, myit rum sai nga

Kabu gara, shayi ap ya

Hpuja ni dat, n htoi masat

Jinghku latsa, du zup du sa

Shawa man hta, hkungran sai da

Karai man hta, shaka sai da

Gade n na, Chying hkai Nu hta

Ga awn madawn, nga mung n ngawn

N chye n kaw, nga nan n pyaw

A tsi jep yu, mahtai n pru

Kraw wang kata, hkri tung ma nga

Chying hkai Wa a, kraw salum hta

N chye tsun hkra, kabu pyaw nga

Nu a n tsa, grau chye na ya

Shawoi na hta, grai bai tsawra

Hkri tung na ma, hkam ja nga hkra

Sadi nga sa, ja htuk sha ya

Shata mung gu, n htoi mung du

Shangai machyi, hkum she gari

Gadau gadap, machyi ga hprap

Salat she grit, myi tum she tsit

Makan dat yu, ma gaw n pru

A tsam htum hkra, makan shaya

N sa htawm htawm, n gun she yawm

Chying hkai Kawa, masin ga hpra

Myit hta tsang pu, Karai hta chyu

Kyu hpyi shaja, kam hpa sai da

Chying hkai Kanu, n gun bai lu

A si a sat, n gun bai dat

A ma chya ngai, shangai dat sai

Shangai ngut tim, sai htaw n zim

Ma ngut machyi, hkum mung gari

Ma ngai hpe mu, n gun bai lu

Chying hkai Kawa, a myit mung la

Ngwi pyaw kabu, sindai gadu

Ji woi ni du, jahtawng mung htu

Shing teng mying jaw, sha ngai dai daw

Wenyi Kawa, Gumhpan sagya

Kyu hpyi hting let, mung ga mung htet

Lata mara, shaman sai da

Shangai ai hpang, a tawng marang

Hkam ja nga hkra, sha up rawng ra

A ma sharu, chyu bai shachyu

Hkum gaw n kam, jit hkri manam

Yup tung yup hka, ma bai rawt ba

Ma bai shayu, yup mung n lu

A kan bai htaw, sin nyen bai raw

Kashin sha tsai, ga yawp ngut sai

Ya sha ya sha, jit hkyi bai bya

A myit galu, n pawt daru

Shing ma e ba, la hpyen e da

Pawn ba maka, kawn lajang wa

Jam jau hkam ai, law la na sai

Ngai ma hkalung, loi li bai kung

Machyi ai ten, ngai myit garen

Nu yen Wa sha, makau e nga

Sarawun zawn, Nu yen Wa gawn

Hkrap tim n pawt, lu sha mung bawt

Ru yak tisn yam, ngai kaw du jang

Latsa lamun, nye a n gun

Nu yen Wa sha, n gun rai nga

Buju bulai, gashin shatsai

Ngai gaw sha mut, shan gaw hta hkrut

Sha san sha seng, Nu yen Wa reng

Shat gawk mung rawng, shadu kachyawng

Sha ngai shaprat, sharing shalat

Hpaji laika, ning pawt Sara

Mung ga n pawt, mau mwi kawn hkawt

Nu yen Wa sha, tsun hkai dan wa

Sak prat ram wa, jawng de sa sa

Chye chyang kung hpan, manu mung dan

Myitsu ai ma, tai wa lu hkra

Ra lam ma hkra, Nu yen Wa sha

Lit hpe n hprai, shakut masai

Nu yen Wa a, myit kraw ni hta

Karai hpe hkrit, myit hpe shagrit

Makam kri tawng, shan hta nan rawng

Kyu hpyi hting lai, Nu yen Wa rai

Kam sham a kyu, shaman chyeju

Ding hku masha, hkam la lu nga

Nu yen Wa a, shing nyip hta

Ngwi ai hka kau, nga ai hta grau

Simsa shara, Nu yen Wa sha

Ding hku kata, ra n rawng hkra

Shani shana, shakut shaja

Pu ai ba ai, tsun n nga ai

Jet ai tsaw myit, shagawng shagrit

Tsun n dang hkra, tsaw myit kaba

Mung kan n tsa, hpa hte shadaw na

Yawng hta grau ai, tsawra myit dai

Gintawng shagan, htoi shata jan

Kam hpa lahpum, a tsam rawng htum

Ding hku masha, hkru kat lu hkra

Shawng lam shing ran, masing hpe gran

Rawt jat na lam, mahkrun hpe tam

Ding hku sharing, sut gan mung chying

Yi ngam maden, lu sha n garen

Prat a n sam, manang la hkam

Masha lapran, u hpawng a man

Myi man n kaji, makawp sari

Kup zup lu hkra, Nu yen Wa sha

Lam shawng kaja, ning baw tai ya

Mung kan hpaji, hparat htau ji

Chye ging chye mai, hkam la lu ai

Nu yen Wa sha, shapan maka

Kanu Kawa, lit ngu ai nga

Lit hpe dum ai, Nu yen Wa dai

Nye sak mung ram, kanam bai tam

Kanam mung mu, kasa shadu

Hkung ga la ra, ging rawng hpaga

Ja baw yawng dat, kanam masat

Nye a matu, ngwi pyaw ding hku

Dinghku byin hkra, Nu yen Wa sha

Ding hku de ya, matut nga pra

Ngai ma sak hkrung, ding hku hkalung

Ra lam ma hkra, Nu yen Wa sha

Dep di naw yu, matut lahku

Kashu bai mu, dai ten pi du

Nu yen Wa sha, lam woi ya nga

Ding hta masa, shing ra maka

Shaning galai, masa shai sai

A sak kaba, gawng kung mat wa

Lahput lagaw, pung hpraw pung law

Shingra machyi, a hkum gari

A ga num htet, n sa mung hkyet

Shawng hpang wun doi, Karai lam woi

Chyeju htang na, ngai myit ai wa

Myit nan n ma, tsawra n ja

Masin n si, ganing n di

Ding hta na woi, Sum Sing wun doi

Dai ni du hkra, ngai myit mada

Kam hpa shara, Kanu Kawa

Ngai ra marit, grai nan katsit

Shabai n mai, hkam sha dik ai

Sum Sing na Nu, sak jan mau lu

Sum Sing na Wa, jan mau kaba

Lu la u ga, kyu hpyi shaja

Nu yen Wa a, tsawra myit hta

Grau ai n nga, ganang wa ta?

Kaba la ai, tsawra myit dai

Pang lai hta dam, gang hkau pi chyam

Shadawn n dang, yawng hta grau ang

Tsun tim n ma, hkai dan n hpra

Nu Wa chyeju, kaba sai ngu

Nu yen Wa dai, sha a ging ai

Ning law hkri awn, shagrau shakawn

Baw gum n ngai, hkung ga jaw ai.

Maran Tang Gun

MATUT HTI NA »

Goi i hkying ten ni gaw lai she lai , Kanu Wawa shagrau ai nhtoi ya bai du ra ai

Myit gaw mani mana zawn sha nga, Nye prat mung laning mi bai dingla jat wa

July shata du shagu, Nye myitprwi si ni kalang mi bai kahte pru

Hpa majaw wa rai ta? Moi na ma prat hpe marit ai wa lai lai nan she nga

Nu yan Wa hpe myit dum dat ai, Nye myit hta shingran mu la n ngai

Nu a hkringtung hta rawng nga yang , Wa a myit mung tsang pu nang

Nu a hkum gawng wa ali ahti nga, mai byin yang Wa bai galai gun yu na

Nu gaw shinggyim machyi kadau, Wa a myit mung nrau nhtau

NAI SAM, U DI HTE HPAHKA

Kalang mi hta mare langai kaw Kawa hte Kasha nga ma ai,

Lani mi hta Kasha gaw Kawa hpe shi a mayak mahkak ni hpe wa tsun a put dan taw ai.

Shi a prat hkrun lam hta awng dang ai lam, myit pyaw myit dik ai lam hpa mung n nga ai hte lam shagu hpe a sum jaw kau mayu wa sai nga myit daw myit htum let Kawa hpe tsun dan ai, mang hkang ni gaw langai hpang langai shi kaw sha byin pru taw ai zawn nga, jam jau jam hkau lam de, dang sang nan gum htawn bang taw ai zawn re majaw myit ru myit daw ai, masha pi n kam pra wa sai nga wa tsun dan taw ai,

Kawa gaw lu sha seng langai kaw bungli galaw ai wa re,

Kasha ya na zawn myit daw myit hten ai hte wa tsun taw ai majaw Kawa mung ganing n chye di ai majaw Kasha a lata hpe dun n na shat gawk de shaga mat wa ai. Ngut nna di kasha masum kaw hka bang n na wan mang kaw wan ja ja hte shaprut da u ai. Hka grai prut wa ai hte di langai kaw Nai Sam bang, langai kaw gaw U Di bang, laga langai kaw gaw Hpa Hka bang rai matut shaprut da wu ai.

Kawa gaw dai hku she galaw mat wa tim kasha hpe ga hkaw mi mung shaga ai lam n nga ai, Kasha gaw Shi Kawa hpa ni galaw taw ai kun nga myit n galu ai hte la nga ai. Tim Shi Kawa gaw lachyum n pru ai hpa mung n galaw ai hpe chye ai majaw a zim sha la yu taw nga ai,

Ram dawn a jang Kawa gaw wan mang kaw na shadu da ai di ni hpe htawn la n htawm shadu da ai Nai Sam, U Di hte Hpa Hka ni hpe wan langai hpra hta bang da nna Kasha hpe san ai.

“ Grai, Wa a Kasha e n dai ni gaw hpa baw ni rai ta”

“ Nai Sam, U Di hte Hpa Hka ni hpe shadu da ai le, Wa”

Kasha dai hku htai dat yang, Kawa gaw Kasha lahpa hpe a hpum la n na, shadu da ai Nai Sam hpe chyam shangun ai, Kasha mung Nai Sam shadu hpe Chyaw(zun) hte a nyaw yu n na,

“Wa Nai Sam ni yawng nyap nna ga a yai mat sai”, ngu tsun dat ai.

Kawa mung Kasha tsun ai hpe hpa mung bai n htai ai sha shadu da ai U Di hpe bai la nna Kasha hpe ga shagun dat ai, U Di kawp hpe la kau ai shaloi gaw a tsawm sha shadu hkut da sai U Di hpe mu wu ai.

Hpang jahtum gaw shadu da ai Hpa Hka hpe bai chyim shangun ai. Kasha gaw mani sum dai rai Kawa shangun ai hte maren a gahtet hpoi hpoi re ai Hpa Hka shadu hpe gawup shakawp nna lu dat yu yang grai manam pyaw nna nam chyim rawng ai Hpa Hka re hpe dum dat wu ai.

Kasha gaw “ Wa hpa hpe tsun mayu ai law”, ngu Kawa hpe san dat yang, Kawa gaw,

“Wa a Kasha e, Nai Sam ma, U Di ma, Hpa Hka ma, n dai n bung ai hpan masum gaw, langai sha re ai mayak mahkak rai nga ai n dai hpum lu hta maren sha shadu hkrum ai, ru yak jam jau lam hpe maren sha hkam sha lai wa ai, rai tim hkam la, hkap la ai lam gaw langai hta langai n bung ai.’

“ Nai Sam gaw rai n shadu shi yang grai ja ai, rai tim shadu kau dat yang kalang dat kya a yai mat wa ai.”

“ U Di gaw rai n shadu shi yang grai ku nna jum ra lang ra ai, loi mi a kawk hkrup ai hte ga a yai mat wa ai, rai tim hka hpum lum prut prut re kaw shadu kau dat yang kata kaw na di tum ni yawng ja mat ai.”

“ Hpa Hka gaw bai myu mi, hka hpum lum grai gahtet ai kaw shadu dat ai hte dai gahtet la ai hka hpum lum hpe mai lu ai Hpa Hka byin hkra galaw kau dat ai.” Ngu nna Kasha hpe tsun sang lang dan nu ai.

Dai re maja, Wa a Kasha gaw gara mahtang rai kun? Nai Sam kun? U Di kun? Hpa Hka kun? Mung kan n tsan na ru yak jam jau, mayak mahkak ni hpe mung kan masha ni yawng gaw hkam sha ra, hkrum hkra ra ai ni chyu re, Wa a Kasha kaw chyu n dai lam ni byin pru ai nre. N dai zawn re yu yak jam jau lam ni hpe Wa a Kasha hkrum hkra katut wa yang gara lam hku ning hkap kau na law? Nai Sam zawn ning hkap na i? U Di zawn ninghkap na i? Hpa Hka zawn ning hkap kau na i? ngu ai hpe Wa a Kasha myit u.? ngu na Kasha hpe tsun dan nu ai.

Maumwi gaw n dai hte mi re,

Tsawra ai myit rum Ramma manaw manang ni, anhte gaw gara ladat hku na tinang kaw du pru wa ai mayak mahkak ni hpe ning hkap tawt lai na kun?

Shing gan n sam hku yu yang ja ja rai n na ru yak jam jau lam ni kaja wa hkrum katut wa yang kya gumba mat nna a tsam marai ni htum mat ai Nai Sam zawn rai na kun? Shing n rai grai ga loi ai U Di zawn rai na kun? N nan daw gaw hkra n mai, myit daw myit hten loi ai, myit kya ai rai tim, yu yak jam jau lam ni hkrum gatut wa yang myit marai n den shaja let ning hkap lai wa nna, nang wa i yu yak jam jau nga let myi man hkrum a dawt ning hkap chye ai myit masa rai kun? N shadu shi yang na U Di hte shadu kau yang na U Di zawn shinggan n sam hku yu yang lak lai ai lam n nga ai rai tim, shadu kau ai hpang kata hta gaw ja la ai myit masa, n gun a tsawm rawng ai wa rai taw ai kun?

Shing n rai, Hpa Hka zawn re masha wa rai kun? Gahte la ai hka hpe a kyu rawng hkra galai shai kau lu ai a tsam marai rawng ai wa rai kun? Hpa Hka ngu ai gaw gahtet magang nam chyim mu magang re. Hpa Hka zawn ru yak jam jau, mayak mahkat ni hkrum gatut wa yang, dai ru yak jam jau lam ni hkrum magang tinang a atsam marai ni jat magang rai hkra sharin hka ja la chye ai ni rai nga ai kun?.

“Dai majaw tsawra ai Ramma manaw manang wa, Manang wa gaw Nai Sam kun? U Di kun? Hpa Hka kun?” ngu ai hpe myit sawn sumru let shakut sa wa nga ga.

Mut Tsawm

MATUT HTI NA »

AWNG DANG AI WA HTE HKRAT SUM AI WA

1. Awng dang ai wa gaw tinang hkum tinang hpe shawng galai shai la ra ai lam hpe chye ai,

Hkrat sum ai wa gaw shingra tara hpe mahtang galai shai kau mayu ai,

2. Awng dang ai wa gaw awng dang na lam mahkrun hpe tam ai,

Hkrat sum ai wa gaw hkrat sum ai lam hpe mara shagun chye ai,

3. Awng dang ai wa gaw mayak mahkak hkrum wa shagu dai kaw na hpaji chye tam la ai,

Hkrat sum ai wa gaw a hkaw a hkang shagu hpe mara shagun chye ai,

4. Awng dang ai wa gaw yu yak jam jau hkrum nna masha ni hting nut mat ai rai tim, Shi a pan dung de du hkra chye lahkam sa wa ai,

Hkrat sum ai wa gaw mayak mahkak lam n nga tim yaw shada da ai pang dung n nga ai,

5. Awng dang ai wa gaw mungkan n tsa n mai byin ai lam hpa mung n nga ai ngu ai hpe myit hta bang tawn ai,

Hkrat sum ai wa gaw n mai byin na lam hpe shawng myit kau ai,

6. Awng dang ai wa gaw manaw manang wa hpe chye na matsan dum ai,

Hkrat sum ai wa gaw tingkyeng a matu sha yu chye ai,

7. Awng dang ai wa gaw sari sadang hte kyang lai len hpe No.1 da nna, sut su ngai mai na lam hpe No.2 kaw da ai,

Hkrat sum ai wa gaw ja sut gan hpe No.1 kaw da n na, kyang lai len hpe No.2 de da ai,

8. Awng dang ai wa gaw awng dang na re ngu myit masin hpe da let shakut sa wa ai,

Hkrat sum ai wa gaw awng dang na lam hpe myit ung ang ai,

9. Awng dang ai wa gaw myit daw hten wa shagu tinang hkum tinang myit n gun a wai la nna galaw ra ai magam bungli ni hpe nhprai ai sha shakut galaw ai,

Hkrat sum ai wa gaw ru yak jam jau hkrum wa ai ten hta n sa kaba shaw na dai kaw sha lim rawng taw nga ai,

10. Awng dang ai wa gaw galaw ra ai mu bungli hpe kalang dat hta galaw ai,

Hkrat sum ai wa gaw loi ai magam bungli hpe sha tam n na dai kaw a ten shama kau ai,

11. Awng dang ai wa gaw tinang hta byin ai, ningtawn ai ni kaw na hpaji la, sharin la chye ai,

Hkrat sum ai wa gaw tinang hta byin ai galu kaba ai ni hpe manawn masham let mara tam ai,

12. Awng dang ai wa a hpyen ni gaw shinggan kaw na sa wa ai,

Hkrat sum ai wa a hpyen ni gaw tinang kata kaw na sha sa du wa ai,

13. Awng dang ai wa gaw rawt jat galu kaba na matu galoi mung myit sharawng nga ai,

Hkrat sum ai wa gaw jam jau n gwi hkam nga ai,

14. Awng dang ai wa a manu dang dik ai a rang gaw Shi a myit mada shara re,

Hkrat sum ai wa a kaba dik ai hkrat sum lam gaw myit mada lam n nga ai re,

15. Awng dang ai wa gaw a hkaw a hkang hpe lu hkra chye galaw la ai,

Hkrat sum ai wa gaw a hkaw a hkang lu na hpe lat taw nga ai,

16. Awng dang ai wa gaw tinang hkum tinang sha myit mada shara re hpe kam ai,

Hkrat sum ai wa gaw awng dang ai lam gaw pung ding gam maka re ngu myit la ai,

17. Awng dang ai wa gaw yaw shada da ai pang dung de du hkra hkawm na myit daw dan ai,

Hkrat sum ai wa gaw shing tawt lam tam na hkawm ai,

18. Awng dang ai wa gaw magam bungli rai n galaw yang shawng myit yu sawn yu ai,

Hkrat sum ai wa gaw myit yu sawn yu ai lam n nga ai sha galaw nna hkrat sum wa yang she myit malai lu chye ai,

19. Awng dang ai wa gaw kalang marang lam lapran hta hkring sa la nna myit hpe a woi la chye ai,

Hkrat sum ai wa gaw law law lang hkring sa la nna myit hpa shabra kau chye ai,

20. Awng dang ai wa gaw shara mi hta sha lahkawng lang n gadang taw ai,

Hkrat sum ai wa gaw tinang hkawm ai lam kaw sha bai gahtap hkawm hkawm rai nga ai,

Mut Tsawm

MATUT HTI NA »