Laika man mali galu ai, Wunpawng Mungdan Shanglawt Hpung (KIO) ningbaw kaba Lanyaw Zawng Hra a mungga hta, Myen mung a mungmasa manghkang ningpawt gaw, 1947, February 12 ya shani, Jinghpaw, Hkang, Sam bawsang ningbaw ni hte Myen bawsang ningbaw Awng San lapran, myit hkrum let munghpawm Myen mungdan jawm gaw de wa ai, labau shang Panglong Ga Shaka hpe daini du hkra shadik shatup ai lam n nga ai majaw re, nga ai.
Panglong Ga Sadi hta bawsang shagu tinang mungdaw tinang hpajang uphkang lu ai, Munghpawm Myen Mungdan gaw gap na myit hkrum tawn ai raitim, 1948 January praw 4 ya hta, Inglik mung maden wa kawn shanglawt lu ai hpang kaw na, masha grau law ai Myen ni sha, mungdan ting hpe up madu sha wa nna, Ga Sadi hpe n gawn n sawn di kau ai lam, mungga hta tsun ai.
Bai, 1947 ning hta ka ai, Mung Uphkang Rara Kanu (constitution) hpe, Panglong myit hkrum ga sadi hte maren n ka ai sha n ga, daini du hkra, bawsang amyu kaji ni gaw, Panglong Ga Sadi hte maren hpa akyu n hkam sha ai hte, Jinghpaw ni mung, Myen ni woi ai asuya hte, ndai mungmasa manghkang hpe ku ntsa man hkrum bawngban hparan la n mai ai majaw, hpang jahtum laknak hpai rawtmalan wa ai re lam, mungga hta tsun da nga ai.
KIA gaw, 1961 kawn 1976 du hkra, laksan awm dawm mungdan gaw de na yaw shada let, Myen ginjaw asuya hte gap hkat wa sai raitim, 1976 kawn gaw, jet ai munghpawm Myen mungdan kata, madu uphkang mungdaw hpyi ai madang de shagrit let rawtmalan sa wa ai gaw, dai ni ten du hkra re.
KIA gaw, 1994 ning February 24 hta, Myen hpyen asuya hte, gap hkat jahkring tawn nhtawm, hpyen asuya a ninggam sanit mungmasa lam masan hpe madi shadaw wa sai.
2004 hte 2007 laman, KIO/A gaw hpyen asuya a mungdan gaw da ai tara nhprang ka ai Mungbawng Zuphpawng (National Convention) de mung, ngut hkra madi shadaw shanglawm wa nna, dai kawn pru ai hpyen asuya htani htana asak galu na lam hkamdahka jaw ai, Mung Uphkang Tara Kanu hpe mung 2008 ning hta, madi shadaw ya sai re.
Ndai zawn n madi shadaw shi yang, KIO/A gaw, jet ai Munghpawm Myen mungdan byin wa na matu mara, kaga bawsang simsa lam hpung 13 hte rau, hpyen asuya a Mungbawng Zuphpawng de laika langai, jawm tang shawn sai re.
Dai hpang mung, Jinghpaw mungdaw hpe Jinghpaw ni nan madu uphkang lu na matu mung, lawnglam 19 hte Mungbawng Zuphpawng de tang madun sai re.
Raitim, dai zawn KIO/A, dinghkrai hte kaga myit rum hpung ni hte jawm tang madun ai lam yawng hpe, hpyen asuya n hkap la ai.
Rawtmalan mungga hta matut nna, ya ten, Myen asuya hte, jahkrup jahkrum ai lam ni galaw tim, hpa mahtai n lu ai lam gaw, Myen asuya gaw, KIO kata magam dap law law nga tim, KIA dap langai hpe sha, shi n pu taw ai, Jarit Sin Dap de gale na sha tsun shadut nga ai majaw re, nga ai.
Ndai Jarit Sin Dap gabaw hte seng nna, KIO hte Myen lapran, lai wa sai, January 29 ya shani hta mung, 10 lang ngu na, Jinghpaw mungdaw mare daju Myitkyina e hkrum shaga wa sai, rai nga ai.
KIO/A ningbaw kaba Zawng Hra a rawtmalan mungga hta, Myen mungdan ting na amyusha ni yawng gaw, jet ai Munghpawm Myen Mungdan byin wa hkra, jawm shakut sa wa na matu mung, saw lajin dat ai re.
KNG
